شىعىس قازاقستان وبلىسىنا جۇمىس ساپارى اياسىندا قر پرەمەر-ءمينيسترىنىڭ ورىنباسارى ەرمەك كوشەرباەۆ اكىمدىكتەر, ورتالىق مەملەكەتتىك ورگاندار, سالالىق ۆەدومستۆولار مەن قوعام وكىلدەرىنىڭ قاتىسۋىمەن كەڭەيتىلگەن كەڭەس وتكىزدى, دەپ جازادى Egemen.kz.
كەڭەستە ميلليونداعان ازاماتتاردىڭ مۇددەسىن قورعايتىن ءتورت نەگىزگى باعىت تالقىلاندى: جازعى ءتۋريزمدى دامىتۋ, بالالار دەمالىسىن ۇيىمداستىرۋ جانە قاۋىپسىزدىگى, مەديتسينا قىزمەتكەرلەرىنىڭ قۇقىقتارىن قورعاۋ جانە مىندەتتى الەۋمەتتىك مەديتسينالىق ساقتاندىرۋ ء(مامس) جۇيەسىن قارجىلاندىرۋ.
تۋريزم: قاۋىپسىزدىك, سەرۆيس جانە باقىلاۋ
ەرمەك كوشەرباەۆتىڭ ايتۋىنشا, ىشكى ءتۋريزمدى دامىتۋ – قازاقستاننىڭ ەكونوميكالىق ساياساتىنىڭ باسىم باعىتتارىنىڭ ءبىرى. بۇل رەتتە قاۋىپسىزدىككە, قىزمەت كورسەتۋ ساپاسىنا, تسيفرلاندىرۋعا جانە كورسەتىلەتىن تۋريستىك قىزمەتتەردىڭ اشىقتىعىنا ەرەكشە نازار اۋدارۋ قاجەت.
«قازاقستان رەسپۋبليكاسى پرەمەر-ءمينيسترىنىڭ تاپسىرماسىنا سايكەس الدىمىزدا ناقتى مىندەتتەر تۇر: تۋريزم سالاسىن تسيفرلاندىرۋ, ينفراقۇرىلىمدى جاقسارتۋ, قىزمەت كورسەتۋ ساپاسىنىڭ ستاندارتتارىن ەنگىزۋ, ينۆەستيتسيالىق تارتىمدىلىقتى ارتتىرۋ جانە سانيتارلىق ءارى ەتيكالىق نورمالاردىڭ ساقتالۋىنا باقىلاۋدى كۇشەيتۋ. بۇل باعىتتار ورتالىق جانە وڭىرلىك دەڭگەيدە جۇيەلى تۇردە جۇزەگە اسىرىلۋى ءتيىس. ازاماتتار مەن ەل قوناقتارى ءۇشىن جازعى ماۋسىمنىڭ قانداي بولاتىنى وسى ۇيلەسىمدى جۇمىستىڭ ناتيجەسىنە بايلانىستى. ءبىز فورمالدى تاسىلگە جول بەرە المايمىز – ەگەر ءتۋريزمدى وڭىرلىك دامۋدىڭ شىنايى قوزعاۋشى كۇشىنە اينالدىرعىمىز كەلسە, جۇيەنىڭ ءاربىر تەتىگى ءتيىمدى ءارى حالىقتىڭ يگىلىگى ءۇشىن جۇمىس ىستەۋى قاجەت», – دەپ اتاپ ءوتتى پرەمەر-ءمينيستردىڭ ورىنباسارى.
تۋريزم جانە سپورت ۆيتسە-ءمينيسترى ەرجان ەركىنباەۆتىڭ سوزىنشە ماڭىزدى مادەني, سپورتتىق جانە ءىس-شارالاردىڭ بىرىڭعاي كۇنتىزبەسى بەكىتىلگەن, ءىس-شارالار تۋريستەر كەلەتىن نۇكتەلەردە QR-كودتار ارقىلى قولجەتىمدى ۇلتتىق تۋريستىك پورتالعا ورنالاستىرىلعان, الايدا كەيبىر وڭىرلەردە بۇل تەك فورمالدى تۇردە ىسكە اسقان, كۋرورتتىق ايماقتاردىڭ باس جوسپارلارىن تسيفرلاندىرۋ تەك ەكى وڭىردە اياقتالعان, قالعاندارى كەستەدەن كەشىگۋدە.
الاكول كولىندە سۋداعى قاۋىپسىزدىكتىڭ جوقتىعى, سانيتارلىق تالاپتاردىڭ بۇزىلۋى, قوعامدىق قولجەتىمدىلىكتىڭ شەكتەلۋى جانە سالىق ءتارتىبىنىڭ ساقتالماۋى سياقتى ماسەلەلەر دە كوتەرىلدى. ەرمەك كوشەرباەۆتىڭ تاپسىرماسى بويىنشا تۋريزم جانە سپورت مينيسترلىگى باسقا دا ءتيىستى ورگاندارمەن بىرگە جاعدايدى تەكسەرىپ, ماسەلەلەردى شەشۋ بويىنشا ۇسىنىستار ازىرلەۋى ءتيىس.
شىعىس قازاقستان وبلىسىنىڭ وڭ تاجىريبەسى ەرەكشە اتاپ ءوتىلدى – مۇندا تۋريزم باسقارماسى قۇرىلعان, ينۆەستيتسيالىق جوبالار جۇزەگە اسىرىلۋدا, ونىڭ ىشىندە ريددەر قالاسىنداعى جىل بويى جۇمىس ىستەيتىن «اناتاۋ» كۋرورتى بار. بيىل مامىر ايىندا وبلىسقا تۋريزم سالاسىنا قۇيىلعان ينۆەستيتسيا كولەمى وتكەن جىلدىڭ سايكەس كەزەڭىمەن سالىستىرعاندا 86%-عا ارتقان.
بالالار دەمالىسى: باسىمدىق – قاۋىپسىزدىك
كەڭەستە جازعى دەمالىس, بالالاردىڭ بوس ۋاقىتى مەن جۇمىسپەن قامتىلۋى ماسەلەلەرى دە تالقىلاندى. وقۋ-اعارتۋ مينيسترلىگىنىڭ مالىمەتىنشە, بيىل 3,2 ملن بالا جازعى دەمالىسپەن قامتىلماق. قازىر 10 مىڭنان استام مەكتەپ جانىنداعى لاگەر, 204 قالا سىرتىنداعى ورتالىق جانە 17 جىل بويى جۇمىس ىستەيتىن نىسان قىزمەت كورسەتۋدە. ۇيىمداستىرۋعا 2500-دەن استام ستۋدەنت پەن 800 ەرىكتى جۇمىلدىرىلعان. رەسپۋبليكالىق ۆەدومستۆوارالىق شتاب قۇرىلىپ, سانيتارلىق جانە قۇقىق قورعاۋ ورگاندارىمەن ءوزارا ءىس-قيمىل جولعا قويىلعان.
«3,2 ملن بالانى جازعى دەمالىسپەن قامتۋدى جوسپارلاپ وتىرمىز. قاجەتتى جاعدايلار جاسالعان: لاگەرلەر, جىل بويعى نىساندار جۇمىس ىستەيدى, وڭىرلىك شتابتار قۇرىلعان. ءار لاگەرگە سانيتارلىق جانە قۇقىق قورعاۋ ماماندارى بەكىتىلگەن. ءتۇسىندىرۋ جانە وقىتۋ جۇمىستارى جۇرگىزىلۋدە. دەگەنمەن, تاۋەكەلدەر ساقتالىپ وتىر, سوندىقتان سانيتارلىق نورمالاردىڭ ساقتالۋىنا جەكە جاۋاپكەرشىلىكتى كۇشەيتىپ, باقىلاۋدى ارتتىرامىز. بالالار ءۇشىن جازعى دەمالىس مازمۇندى ءارى قاۋىپسىز بولۋى ءتيىس», – دەدى وقۋ-اعارتۋ ۆيتسە-ءمينيسترى ەدىل وسپانوۆ.
مەديتسينا قىزمەتكەرلەرىن قورعاۋ – زاڭ اياسىندا. ەرمەك كوشەرباەۆ مەديتسينا قىزمەتكەرلەرىنە جاسالعان شابۋىلدارعا الاڭداۋشىلىق ءبىلدىردى. 2019 جىلدان بەرى ەلدە 161 وسىنداي قىلمىس تىركەلگەن.
«مەديتسينا قىزمەتكەرلەرى العىسقا عانا ەمەس, ناقتى زاڭنامالىق قورعاۋعا دا لايىق», – دەدى ەرمەك كوشەرباەۆ.
وسىعان بايلانىستى ايدىڭ سوڭىنا دەيىن مەديتسينا قىزمەتكەرلەرىنە قاتىستى زورلىق-زومبىلىق ءۇشىن قىلمىستىق جاۋاپكەرشىلىكتى قاراستىراتىن قىلمىستىق كودەكسكە وزگەرىستەر ەنگىزۋ جونىندەگى زاڭ جوباسى ۇكىمەتكە ۇسىنىلۋى ءتيىس.
ءمامس قارجىلاندىرۋ: باقىلاۋدى كۇشەيتۋ
الەۋمەتتىك مەديتسينالىق ساقتاندىرۋ قورىنىڭ دەرەكتەرىنە سايكەس, كەيبىر وڭىرلەردە قاراجاتتى باسقارۋدا بۇزۋشىلىقتار جانە ماقساتسىز پايدالانۋ جاعدايلارى انىقتالعان. وسىعان وراي ۆيتسە-پرەمەر دەنساۋلىق ساقتاۋ مينيسترلىگى مەن ءمامس قورىنا جۇيە قاراجاتىنا باقىلاۋدى كۇشەيتۋ, ماقساتتى پايدالانۋ بويىنشا اۋديت جۇرگىزۋ, بارلىق قارجىلىق وپەراتسيالاردىڭ اشىقتىعىن قامتاماسىز ەتۋگە قاتىستى بىرقاتار تاپسىرما بەردى.
كەڭەس قورىتىندىسى بويىنشا ەرمەك كوشەرباەۆ جازعى ماۋسىمدا حالىقتىڭ قاۋىپسىزدىگى مەن ءومىر ساپاسىن ارتتىرۋعا باعىتتالعان ناقتى تاپسىرمالار جۇكتەدى. تۋريستىك ينفراقۇرىلىم مەن بالالار لاگەرلەرىنىڭ جاعدايىنا باقىلاۋدى كۇشەيتۋ, سانيتارلىق جانە ءورت قاۋىپسىزدىگىن قامتاماسىز ەتۋ, كۋرورتتىق ايماقتاردى تسيفرلاندىرۋ مەن تۋريستىك قىزمەتتەردى فيسكاليزاتسيالاۋ جۇمىستارى جانداندىرىلماق. سونىمەن قاتار مەديتسينا قىزمەتكەرلەرىنىڭ قۇقىقتارىن قورعاۋ مەن ءمامس قاراجاتىن ءتيىمدى پايدالانۋ ماسەلەلەرى ءجىتى نازاردا بولادى. بارلىق شارالار ازاماتتار ءۇشىن قاۋىپسىز جانە جايلى ورتا قالىپتاستىرۋعا, سونداي-اق الەۋمەتتىك سالانى جۇيەلى تۇردە دامىتۋعا باعىتتالعان.